GESU', NON NASCIRI PPI ST'ANNU!
Data: Marted́, 12 dicembre 2006 ore 00:05:00 CET
Argomento: Rassegna stampa


NATALI 2006 (Paolo Sessa)

Non nasciri ppi st’annu!
Senti cchi friddu?
Unni va ennu
ccu st’allustru ‘i luna?
Lu sangu ‘nta li vini
già tuttu ni quagghiau
e ‘nta lu cori
non n’arriva cchiui.
Non ti n’accorgi
ca cca semu lupi
e di ciareddi
non n’ancontri mai?

Non nasciri ppi st’annu!
‘ntempu si stava
ccu lu cori allegru
e facci risulenti,
facennu ognunu
chiddu ca puteva
ppi darici rizzettu
a bummuli e lamenti
ca si è festa
nuddu à disiari
né ‘na carizza
e mancu du’ sanari.

Non nasciri ppi st’annu!
E a menzanotti
di lu vintiquattru
‘nfacci a l’artaru
lassini aspittari
comu tanti allocchi
menzi stralunati
e ccu la vucca aperta;
e a li putenti
ca ni fanu ‘ncasu
lassili all’antu
ccu tri palmi ‘i nasu.

Non nasciri ppi st’annu!
Dicci a li magi
di sbagghiari strata
e irisinni appressu
a n’autra stidda
spirannu ca s’astuta
puru idda
e ca ni lassa o scuru;
allura, forsi,
ccu stu ‘nsignamentu
mintemu tutti
‘npocu ‘i sintimentu.


Non nasciri ppi st’annu!
Ma si ppi forza à nasciri
arriva priparatu,
pottiti ‘nsacchittu
‘i beni macinatu
e spatticcillu a tutti:
a li ‘mbriachi
dacci vinu bonu
a li curnuti
‘npocu di pacenzia
a ccu cumanna
‘npocu di sapientia.

Dacci a ognunu
chiddu ca c’ aggiuva,
ma sopra tuttu,
lassiti priari,
a certa genti,
aprici la testa
e immantinenti
carchici giudiziu,
ccu la speranza
ca sti quattru lupi
perdunu lu viziu
anveci di lu pilu.

Ascutami, Bamminu,
ca n’a fazzu longa,
tu fatti chiddu
c’à dicisu ‘i fari,
ma u mo pinzeri
lassimillu diri:
si era o postu to
iù, non nasceva,
mi stava o caudu
e non mi muveva
ppi darici a lu munnu
‘nsignamentu.

La sira di vigilia
cchi fai ca mangiatura?
Cerchiti ‘npostu
ppi la to ‘mpurtanza,
stenniti comutu
e varda ‘nluntananza
chiddu ca fanu
sti quattru pizzenti;
e quannu a naca leggia
vardamu spaisati
teniti forti i cianchi
e fatti du risati.

Non nasciri ppi st’annu.





Questo Articolo proviene da AetnaNet
http://www.aetnanet.org

L'URL per questa storia è:
http://www.aetnanet.org/scuola-news-5994.html