Cchi strana ca mi pari sta notti di Natali
‘Nta sta nuttata muta
e scarica di stiddi
si sciogghiunu paroli
ca parunu spisiddi
sfuiuti ‘ntra la cinniri
d’un loccu fucularu
ca luci n’avi quantu
la varba di Innaru.
E quantu po’ durari
stu luci tramurtutu
c’appena brucia anticchia
accupa e si sta mutu,
c’a forza cchiù non l’avi
di quannu era carusu
ccu cori ca frieva
allegru e ginirusu.
Cchi strana ca mi pari
sta notti di Natali
ca si ripeti a stissa
ogn’annu tali e quali:
lu Bammineddu nasci
‘nta stissa mangiatura
cchi stissi armali e omini
a farici calura.
Ma allura chi è ca cangia
si lu Natali è u stissu?
Pirchì ‘nto cori ‘nghiommuru
mi si ci allippa o spissu?
Miatu lu Bamminu
ch’è u stissu ‘ota ppi vota,
mentri ca di cuntinuu
ppi mmia furria a rota.
Avannu smogghimillu
stu ghiommuru ‘mbrugghiatu
e sciogghi lu me cori
ccussì arripigghia ciatu.
Si poi, ppi ttia, Bamminu,
‘nci fussi nenti ‘i mali
macari iù vulissi
rinasciri a Natali. Paolo Sessa