Littra a Gesù Bamminu (P. Sessa)

Si ai cartucci, sparili,
tempu cchiù non nn’avemu
ccu tutta sta malura
‘i cca non ni niscemu.

A crisi era a li porti
ora l’avemu ‘ncasa
o riccu non ci nni futti
ma o poviru lu sfasa.

Senti, Gesù Bamminu,
ssu pocu ca po’ fari
megghiu c’o fai subbitu
ca stamu p’affucari.

C’è ll’euru ca scinni
e scinni puru u dollaru
m’allura cu è c’acchiana,
no è ppi casu u talliru?

Varda chi facci anu
ssi quattru malandrini
ca si jucaru a borsa
risparmii e li quattrini,

chiddi di puvirazzi
genti travagghiatura
ca com’a ttia finìu
intra ‘na mangiatura.

Bestia armali stupitu,
cu mi lu fici fari,
ddi quattru sordi a banca
m’i fici rusicari.

Ma ‘u mali non è ppi mmia,
è ppi lu puvireddu
ca comu a ttìa arristau
ccu voi e l’asineddu.

U vidi ca furrìa
cchi jargi sculuriti
non sapi cchi c’agghiorna
si fami oppuru siti.

Tu sulu n’a po’ fari                           
‘na bella ‘mpruvvisata:
ssi quattru sucasangu
abbuddili ‘nta pignata.

Facci ‘nstufatu tipicu
tu ca sa’ cucinari,
ca ci su panzi leggi
c’apettunu a mmangiari.

Ascuta, Bammineddu,
non diri ca è tichetta,
si ttu ca lu dicisti
ca cu la fa l’aspetta.

Chissi n’anu spurpatu,
lassannu sulu l’ossa,
ora cchi c’è di mali
si c’arrinnemu ‘a mossa?

U sacciu ca si bonu
e ai lu cori duci,
ma ‘nventiti quaccosa,
nn’i senti quantu vuci?

Mintemu, fai ‘nmiraculu
di chiddi ccu lu micciu,
rivota all’anchi all’aria
stu munnu chinu ‘i picciu:

cu a statu riccu fausu
ora resta ‘nmutanti
e a tutti i mangiapicca
ricchizzi sull’istanti.

Allura, c’ama ffari?
N’a fai sta ‘mpruvvisata?
Si ti ci metti ‘i ‘mpegnu
mi fazzu ‘na risata.

T’ammagini cchi facci
ca fanu ddi cafuni?
Mangiavanu filettu
e ora c’è quarumi.

Senti, Bamminu, ascutimi,
tempu cchiù non n’avemu,
si ai cartucci, sparili,
allura n’arrinnemu.

                         (Paolo Sessa)